該主題包含 0 則回覆,有 1 個參與人,並且由 於 2020 年 4 月 14 日 下午 12:55 最後更新。

  • 作者
    文章
  • #13601
     Adm Buddy 
    管理員

    復活節四日長假期,全世界封關,澳門也被迫半封島,所以小生們也只能被困小島。雖天朗氣清,陽光普照,但畢竟吹強烈既季候風(扯黑球),影響出船意欲。

     

    係澳門,玩船係非常痛苦既事,除了配套少,無地方去外,吹不同風都會直接影響出船。就以我地由內港《林茂塘》出發來講:

    – 吹東風時,由「內港航道」去到西灣橋時,已會感到碧波蕩漾,行到《舊大橋》時,會感到水花濺起,再行出小小到《友誼橋》時,海浪又大又亂,海床被水流反起,成海都是黃泥水,所以小生們大多唔會選呢條「往外港航道」行。而係到《十字門》後,經《海洋花園》外圍行「路氹航道」到路環《譚公廟》後即調頭回航,因再出去《竹灣》或《黑沙》基本都係波濤洶涌,無地方拋錨欣賞風光,講真,隻船被拋上拋落真係無乜心情去欣賞。如真係要夾硬拋錨的話,只能在《黑沙》舊威詩丁酒店近岸邊處勉強避到D浪,比浪拋下拋下絕唔舒適,亦無幾多人頂得順。

    – 吹南風時,可能係最好出船既時機,通常都係浪靜風平,去邊都得,但好多時都濕濕笠笠呢!

    – 吹西風時,同吹東風相反,由「內港航道」經「往外港航道」到友誼橋甚至到《機場》外圍基本風浪不大,但再出少少就會食正西風嘅風浪,如果只係普通遊船河,就應該返航。另一邊,由「內港航道」經「路氹航道」,基本可以幾舒服去到《竹灣》,但若要去遠少少既《黑沙》,就因為受西風影響,風同浪都會大好多,而如要落錨就只能係龍爪角近海灘邊落,因為舊威詩丁酒店果邊食正西風。

    – 吹北風時,因澳門嘅地勢,若只係微北,一般風浪並唔會影響出船,無論去《機場口》、《竹灣》同《黑沙》都冇難度,只係凍小小;若為大北時,則近岸風勢雖大,但海浪基本並不會太高,爛玩的仍可以出嘅。

     

    對於機動船,好多時雖然風高浪急,但係航行上,若果唔嫌辛苦,兼對隻船嘅機件有信心的話,其實基本邊到都去到嘅 (咁當然要視乎船嘅大細,同船長嘅經驗喇),最多係慢D啫;但係大風嘅情況泊船碼頭時,就真係好考船長嘅“功力”,因受不同風向嘅影響而失去陀效,要不斷加油、收油、左轉、右轉、向前及向後地去調整船進入泊位嘅角度方向,顧前顧後,顧風向、顧其它船,真係少D定力同功架都有可能搞到碰撞。所以勸籲各位船長得閑時不妨多D練習泊船,熟習下自已隻船嘅性能,溫故知新,強化自已操作能力,為隨時可能遇到嘅不確定情況作準備。

     

    玩船,要返工時唔出船,唔得閑時唔出船,打風落雨時唔出船,去旅行時唔出船,壞船或要維修保養時唔出船,冇腳時又唔出船,風向唔啱時都唔出船。咁大家知唔知究竟每年有幾多日可以出到船呢!?!?!?!?我就唔知!!!

正在檢視 1 篇文章 - 1 至 1 (共計 1 篇)

「一.版主發佈區」討論已關閉,無法發表主題與回覆。

©2020 MacauBoating.com 澳門遊艇交流

Log in with your credentials

or    

Forgot your details?

Create Account