關於我們

三個來自唔同背境嘅朋友(“Eric”、“Hugo” 同 “王生”),因為遊艇而認識,繼而成為老友。而家我哋每星期傾吓「船」嘅習慣早已成為生活嘅常態。

玩咗幾年船,見到澳門嘅遊艇活動既唔普及又缺推廣,有幸加入嘅主要都係身邊有船嘅朋友。大部份有興趣又有船牌嘅「好船一族」,都唔識得有人玩船,所以都唔知點樣開始「入行」玩。另外,好多人都以為玩遊艇係一項「高消費」嘅「高尚娛樂」而唔敢入門,即使去到林茂塘海邊見到D船咁靚,好多時都唔夠膽行去問下,了解下係乜情況。

其實,玩遊艇呢樣嘢真係「豐儉由人」,大有錢人可買幾千萬甚至過億嘅新船,好似我呢類小康人仕就可買隻二手船玩住先;船價方面,十萬八萬一隻又有,幾十萬至過百萬一隻亦有。好似我地三個小生咁,初初入門時就係買左隻幾萬蚊既二手艇,玩得一樣咁開心,而每月嘅費用亦只係1、2千蚊,平過養架車(但維修保養就係大問題,自已最好點都要認識下機器嘅嘢)。

為咗改變澳門本地人認為玩親遊艇都係社會上「特殊階級」、「有錢人」、「富豪玩意」專利嘅觀感,我哋三個小生幾年前開始係「Facebook」上,分享我哋玩船地嘅樂趣。但係「臉書」上提供嘅信息畢竟有限,所以我地就決定搞翻個網,提供多D澳門嘅遊艇資訊比有興趣嘅網友。

我地呢個網純粹提供資訊,並以“玩”為主,唔想有乜商業味道。希望能夠藉此「娛已娛人」,除用作提供信息嘅平台之外,亦可作為溝通不同網上船友嘅渠道!

網友如有任何問題,歡迎聯絡我們。有時間又夾到得閒嘅話,亦可以約埋出船出海遊遊吹吹風兼吹吹水(當然要夾翻電油錢啦)!

©2019 MacauBoating.com 澳門遊艇交流

Log in with your credentials

or    

Forgot your details?

Create Account